Ginkumpirmar sang director sang social action center sang Diocese of Bacolod nga ila pa sapulan sang tul-id kun siraduhan ang mga patyo sa tigkalalag bangud sa COVID-19.
Nahibaluan nga igarekomendar ni National Policy Against COVID-19 chief implementer Carlito Galvez nga tun-an ang pagsirado sang tanan nga mga patyo sa tigkalalag agud nga mapunggan ang paglapta sang coronavirus.Sa interview sang Bombo Radyo kay Father Chris Gonzales, ginpahayag sini nga pabor ini kag indi pabor sa pagpasirado sang mga patyo sa tigkalalag bangud nagapati ini nga sarang ini makontrolar kun may pamaagi nga mapadayon ang pagduaw sang Nobyembre 1.
Suno sa iya, kun mangin kaangay gid man sa Manila ang sitwasyon sang tigkalalag sa ciudad kag probinsya, amat-amatun na pakadto sa mga patyo ang mga tawo ukon sa balay nalang sila magaselebrar.
Sarang man nga iupod na lang sa pangamuyo ang mga minatay suno sa iya.
Nagpahanumdum man ini sa mga pumuluyo ilabi na sa mga ginikanan nga tudluan ang mga kabataan sa pagpangamuyo sa tion sang lockdown.
Gindugang man sini nga hatagan sang pagtamod ang pagpananom agud may kalan-on sat ion sang emerhensya kag indi lang magsalig sa foodpacks.
Nagpang-abiso man si Father Gonzales nga magsunod gid sa mga protocols, atipunon ang pamilya kag ikaayong lawas.
