Magabaton sang dugang nga supply sang personal protective equipment, masks, test kits kag iban pa nga mga essentials sa pagpakigbato sa coronavirus disease ang ciudad sang Bacolod.
Sa pagsinapol kaupod ang mga opisyales sang Bacolod City sang Miyerkules, ginpahayag ni Secretary Carlito Galvez Jr., chief implementer sang National Task Force (NTF) Against COVID-19, ginpahayag sini nga nagdala ini sang 5,000 nga set sang PPEs para sa ciudad nga iya una na nga ginpromisa.
Magluwas diri, magapadala man ang NTF sang 5,000 ka mga test kits; 4,000 KN95 masks; 4,000 surgical mask; kag isa ka batch sang automatic RNA extractor kits sa ciudad.
Magahatag man sang 10,000 ka mask ang Department of Social Welfare and Development (DSWD) ang Bacolod.
Ginpahayag ni DOH Assistant Secretary Charade Mercado-Grande nga ang isa ka PCR machine ang igastation sa Corazon Locsin Montelibano Memorial Regional Hospital (CLMMRH) Molecular Bio-laboratory.
Si Galvez ka gang team sini ang nagsapol kay Mayor Evelio “Bing” Leonardia, mga opisyales sang ciudad kag mga miyembro sang Emergency Operations Center Task Force sa Bacolod City Government Center sang Miyerkules agud diskusyunan ang mga operasyon agud matapna ang COVID-19 pandemic.
Sa nasambit nga meeting, ginpresentar sang mga city officials ang COVID-19 Bacolod situationer kag intervention strategy.
Suno kay Galvez, bangud nga kalabanan sa mga ospital ang nahamtang sa Bacolod, ginaakomodar man ang mga pasyente nagikan sa probinsya.
Gani ginalauman na nga maoverwhelmed ang ciudad bangud ini ang “hub”.
Nagapati man ini nga maganubo ang mga kaso sang Bacolod sa madasig nga panahon ilabi na nga ginpadala sanday Environment Secretary Roy Cimatu kag Major General (Retired) Melquiades Feliciano, chief implementer of IATF-Visayas agud magbulig sa ciudad.
Ginhatagan man ni Galvez pagtamod ang importansya sang pagharmonize sang efforts sang ciudad batok sa COVID-19 sa Provincial Government.
Ginpahibalo man sang NTF nga santo sa bag-o nga guidelines, wala na ginapahanugutan ang paghome quarantine sang mga asymptomatic ukon mild COVID-19 patients bangud pagasayluhon ang mga ini sa isolation facilities sang ciudad.
Samtang, nagpatigayon naman sang Seminar on Contact Tracing sa lobby sang MassKara Hall si Mayor Magalong kun sa diin 170 ka mga persona nga gindesignar bilang contact tracers sang ciudad ang nakigbahin.
Ang nasambit nga seminar ang ginfacilitate sang Bacolod City Health Office kaupod si Mayor Magalong, Cebu City CHO kag Cebu City Police Office.
