Lusot na sa Sangguniang Panlungsod sang Bacolod ang resolusyon nga ginduso ni Councilor Dindo Ramos, chairman sang Committee on Transportation, tuhoy sa pagpain sang pondo para sa financial assistance sa mga naapektuhan sang coronavirus pandemic.
Nahibaluan nga nagaapela ang transport groups nga hatagan sila sang ayuda bangud wala sila sang kuhaan sang inugbakal sang pagkaon subong nga wala sang byahe.
Sa virtual session nga ginpatigayon sang SP kahapon, ginpahayag ni Ramos nga bangud yara sa karun ang Bacolod sa modified enhanced community quarantine (MECQ), suspendido ang pampubliko nga transportasyon kag apektado ang mga drivers kag pila pa ka mga sektor.
Gani, ginpropose sini nga magpain sang pondo nagikan sa P119 million nga bilin sang ciudad sa Bayanihan Fund nga igabalik sa kaban sang gobyerno kun indi magamit sa katapusan sang tuig.
Sa idalum sang resolusyon, pagahatagan sang financial assistance ukon rice subsidy ang mga naapektuhan sang pandemic kag quarantine kag yara na kay Mayor Evelio “Bing” Leonardia ang desisyon kun pila ang kuhaon nga pondo subong man ang pagtumod kun ano nga mga sektor ang panghatagan.
