Ginakalipay sang Metro Bacolod Chamber of Commerce and Industry (MBCCI) ang plano ni Mayor Evelio “Bing” Leonardia nga magsulat sa national inter-agency task force against COVID-19 nga pahanugutan ang pagbalik sang pampubliko nga transportasyon sa Bacolod City.
Sa interview sang Bombo Radyo kay MBCCI chief executive officer Frank Carbon, ginpahayag sini nga sa pamulong-pulong nga ginpatigayon sang mga opisyales sang ciudad kag mga katapo sang NIATF nga ginpadala ni Presidente Rodrigo Duterte sa Bacolod, magaayo ang alkalde sa national government nga pahanugutan ang mga PUJs kag iban pa nga pampubliko nga transportasyon sa pagbyahe kag iga-endorso man ini ni National Policy Against COVID 19 chief implementer Carlito Galvez agud maaprubahan.
Suno kay Carbon, maayo ang nasambit nga tikang agud makagiho ang mga tawo, makabalik ubra ang mga empleyado kag makabaton sang sweldo.
Suno sa iya, halos wala na sang economic activity ang ciudad bangud magluwas sa ginapatuman sang Home Quarantine Pass nga may odd-even scheme, border restrictions kag curfew, gindumilian man ang pampubliko nga transportasyon.
Suno diri, ang nasambit nga mga restrictions ang nagacontribute sang pagpahinay ukon pag-freeze sang economic activity sa Bacolod nga matuga sa pagkapatay sang ciudad kun magpadayon.
Suno kay Carbon, ang pagpakig-away sang virus ang kinahanglan ginaangot man sa sitwasyon sang ekonomiya.
Suno diri, kun mapierde gid man ang COVID apang ubos kag sirado naman ang mga negosyo, dako gihapon ang problema sang ciudad gani indi dapat pagbuy-an ang ekonomiya.
