Pila sa mga nagpositibo sa ginpatigayon nga mass testing sa ciudad sang Bacolod ang wala pa nacontact tubtub subong bangod indi macontact nga numero ukon lain ang address nga ginsulat sa information sheet.
Suno kay Bacolod City Councilor Renecito Novero, kun nagpositibo ang isa ka persona gilayon ini nga ginainform sang City Health Office.
Apang pila sa mga nakigbahin sa ginpatigayon nga mass testing ang may sala ukon kulang ang ginbutang nga impormasyon gani mabudlay sila pangitaon.
Padayon naman nga ginapahanumdom sang konsehal nga magkooperar ang mga pumuluyo sa amo nga tinion.
May mga nagpositibo man suno sa konsehal nga sa baylo nga magkooperar, nagapanago pa sa mga opisyal.
Ginakahangaw-an naman nga makalatun ang mga ini kun padayun nga maglagaw.
Samtang, indi naman kabahin ang Red Cross sa ginapadal-an sang specimen samples bangud nagakinahanglan ini sang bayad.
Indi man masalig sa Philhealth ang pagbayad bangod may utang pa ang ahensya.
Paathag man ni Novero nga dapat magpaidalum sa 14 days quarantine ang mga nagpakuha sang swab.
Apang kun nakalampuwas na sa 14 days kag nagapabilin nga asymptomatic, makabig naman ini nga hilway na sa balatian.
Kun luyag naman nga magbalik sa trabaho apang wala pa sang resulta, sarang naman nga magdangop sa City Health Office agud nga mangayo sang clearance.
Apisar sa clearance nagikan sa CHO, kun indi pa gid magpasugot ang mga employer sa pagtrabaho, sarang naman ang mga ini nga mangatubang sang legal cases.
