Bangud sa itlog, nagreklamo ang isa ka COVID patient nga naka-quarantine sa Luisa Medel National High School quarantine facility.
Nagpost sa social media ang isa ka COVID patient sang ¼ size sang itlog nga kabahin sang ila nga meal.
Nakakuha ini sang nanari-sari nga reaksyon nagikan sa mga netizens.
Suno kay Aileen Hulleza, team leader sang kitchen sa amo nga quarantine facility, tama ka misleading sang post sang amo nga pasyente bangud ang itlog lang ang iya gin-post kag wala niya ginpost ang fish tocino, miswa kag saging nga ginserbe nga ila pamahaw.
Gin-athag man ni Hulleza nga ang itlog ang ginhimo lamang nga garnish bangud naubusan sila sang pipino.
Kuntani suno diri, kun may yara sang reklamo ang pasyente sa pagkaon nga ginserbe sa ila, dapat nagdiretso nalang hambal sa ila kag wala na ginpost pa sa social media.
Dugang pa ni Hulleza nga tani wala nalang gindalahig sang pasyente si Mayor Evelio “Bing” Leonardia bangud nga wala man sang kahilabtanan ang alkalde sa mga pagkaon nga ginaserbe.
Nagapangabay man ang team leader sang kitchen nga tani maintindihan man sang mga naka-quarantine ang kahimtangan kag kabudlayan sang mga staff nga nagatrabaho bangud nga wala na gani sang dayoff ang mga ini kag timprano pa nga naga-duty.
Dugang pa ni Hulleza nga kun indi sila gusto sang pagkaon, pwede man ang mga ini mag-request basta sa kutob sang masarangan lang sang kitchen staff nga maluto.
Samtang, ginkumpirmar naman ni Stephanie Guino, nurse sang amo nga pasilidad, nga ginatinguhaan gid sang kitchen staff nga mahatagan sila sang kumpleto nga meal kada adlaw.
Suno diri, kun ano ang pagkaon sang mga pasyente amo man ang pagkaon sang mga nurse kag staff nga nagabantay.
Kuntani indi lang ang itlog ang ginpost sang pasyente bangud tama ka misleading sini.
Madamo naman sang nakaagi nga naka-quarantine sa amo nga facility lakip na ang mga OFWs nga wala man sang reklamo suno kay Guino.
Sa pagkamatuod suno sa iya, busog gid sila permi kag positibo gid ang feedback sa ila nga kitchen.
Ginpanindugan naman sang nagreklamo nga pasyente, nga indi misleading ang iya nga post bangud nga itlog lang man ang iya concern.
Suno diri, iya kuntani tinutuyo nga mapalab-ot sa gobyerno ang ila sitwasyon.
Dugang pa sang pasyente nga ginbutang sila gani sa quarantine facility agud ma-boost ang ila immune system.
