NEW YORK CITY – May yara sang pagbag-o sa pagdumdom sang mga Americano sang 9-11 attack karon sa gab-i oras diri sa Pilipinas bangud sa coronavirus.
Sa interview sang Bombo Radyo kay Bombo Correspondent Alex Vidal nagikan sa New York City, ginrecord na lamang sang mga himata sang mga nagtaliwan sa 9-11 attacks ang mga ngalan nga ginalawag santo sa kinaandan nga pagkomemorar sang nagtaliwan sa programa nga hiwaton sa gintindugan sang world trade center bangud sa pamahog sang COVID-19.
Ang 9-11 attacks nga natabo sadtong September 11, 2001 ang ginhimo sang Islamic terrorist group nga Al-Qaeda batok sa Estados Unidos.
Ini ang nagresulta sa kamatayon sang malapit tres mil ka mga pumuluyo.
Suno kay Vidal, kabahin sa programa sa pagkomemorar sang 9-11 attacks ang dungan nga pagbagting sang mga lingganay sang mga simbahan malapit sa Hudson River nga wala maigo sang pagpang-atake sa pag-abot sang alas 8:45 ang takna sa aga, Setyembre 11 oras sa US ukon alas 8:45 karon sa gab-i diri sa Pilipinas.
Ginlaragway man sini nga mahipos ang pagpatigayon sang programa sa komemorasyon.
Sa tion naman nga magtunod ang adlaw, may isa ka suga nga magafocus sa gintindugan sadto sang twin tower.
Wala naman ginapaabot sang mga pumuluyo nga mag-upod sa pagkomemorar ang mga political leaders.
