CALIFORNIA – Ginakabig nga pinakadako nga wildfire ang nagaluntad sa karon sa bear county sa California, USA nga naglab-ot man sa bahin sang Oregon kag Washington.
Sa interview sang Bombo Radyo Bacolod kay Bombo Correspondent Alex Vidal, ginpahayag sini nga ginatawag ang wildfire nga August Fire Complex nga nakalapaw sa record kun sa diin nagalapad ang sunog kag padayon nga ginatinguhaan sang mga otoridad nga mapalong ang kalayo.
Gin-athag man sini nga wala sang kamatuoran nga gin-umpisahan sang mga aktibista ang natabo nga wildfire.
Ginakulbaan man sini nga magalapta sa madason nga semana ang wildfire bangud sa intense heat wave kag mamadlos nga hangin.
Ginlaragway man sini nga daw kaangay nga yara ini sa Baguio City sa Pilipinas bangud sa fog kag mahimo nga indi tuman kadamo ang pamalay nga apektado bangud nabukid ini nga lugar.
Nagalaom man ini nga mag-ulan agud nga mapalong ang wildfire.
Ginalantaw man nga sarang naghalin sa mga ginpatindog nga mga pamalay sa nabukid nga bahin sang California ang kalayo.
Ginpahayag man ni Vidal nga 18 ka mga rainforest ang gintupok sang wildfire.
Suno pa diri, indi man apektado ang syudad sang California sang wildfire.
