Ginpasalig sang Bacolod City Police Office nga ginatsekyar ang home quarantine pass sang mga indibidwal nga nagasakay sa pribado nga salakyan sa tagsa nga maglabay sa inner ukon outer border control point.
Ini ang kasunod sang obserbasyon sang Bombo Radyo Bacolod nga halos wala sang kinalain ang kadamuon sang mga salakyan subong nga yara sa idalom sang modified enhanced community quarantine kag sang tinalikdan nga yara sa idalom sang modified general community quarantine ang ciudad.
Sa interview sang Bombo Radyo kay BCPO spokesperson Police Lt. Col. Ariel Pico, ginatsekyar ang HQP sang nagasakay sa private cars agud masiguro nga nagagwa sila sa mga inadlaw nga ginapahanugutan base sa odd-even scheme.
Ang mga empleyado naman ang magapakita sang company ID ukon certificate of employment.
Ginpanugyan man ni Pico sa mga nagatrabaho ukon essential workers nga magkuha sang certification sa mga employer nila kun naga-overtime ang mga ini agud ipakita sa border control sa tion nga sila ang magapauli magluwas sa company ID.
Nagpahanumdom man ini sa mga pumuluyo nga wala sang makagwa sa adlaw nga Domingo bangud sa Sunday lockdown kag wala sang gina-honor nga Home Quarantine Pass kag indi na mag-eskapo bangud kun madakpan, arestuhon kag sarang nga makasuhan sang paglapas sa Article 151 sa idalom sang revised penal code ukon Resistance and Disobedience to a Person in Authority.
