Gin-athag ni Mayor Evelio “Bing” Leonardia nga apisar nga napaidalum sa Modified Enhanced Community Quarantine (MCEQ) ang Bacolod tubtob Setyembre 30, wala sang total lockdown sa ciudad, indi kaangay sang pahayag sang pila ka mga sektor.
Sa statement nga ginpagwa ni Leonardia, ang nagakaeksperyensyahan sang Bacolod sa idalum sang ECQ amo ang “slow down” kag indi lockdown.
Gindugang man sini nga ang MECQ ang ginpatuman sang national inter-agency task force (NIATF) sang nakit-an ang pagtaas sang kaso sang COVID sa ciudad sa una pa lang nga mga inadlaw sang Setyembre.
Gani, obligasyon sang ciduad nga ipatuman ang mando sang NIATF lakip na ang suspension sang pampubliko nga transportasyon bangud nalakip ini sa mga restrictions sa MECQ.
Athag man sa pagsulundan sang NIATF, suno sa alkalde, nga madamo nga mga negosyo kag mga opisina ang ginapahanugutan pa nga magbukas sa idalom sang MECQ apang magabuhin lang sang operating capacity.
Gani kun desisyunan sang mga negosyo nga magsira sa tion sang MECQ, ila na ini kaugalingon nga option.
Aminado man ini nga madamo ang nagareklamo sa suspension sang public transport bangud madamo nga mga negosyo ang mabudlayan sa pagbaligya kun wala sang byahe ang mga salakyan.
Suno sa iya, posible nga ini ang gintunaan kun ngaa ginapinsar sang mga tawo kag pila ka sektor nga nagapatuman sang total lockdown ang ciudad apang ginpahayag sini nga ang suspension sang pampubliko nga transportasyon nga kinahanglan ipatuman bangud ini ang pinakadako nga deperensya sa tunga sang MECQ kag GCQ.
Gindugang man ni Leonardia nga halin sa single-digit nga rekord sa bilog nga bulan sang Marso kun sa diin may yara lang sang anom ka mga kaso, sa karun, nagadangat na sa triple digits ang nagakarekord kada adlaw.
Sa bulan sang Abril, nakarekord lang sang 16 ka mga kaso; lima sang Mayo; 37 sang Hunyo; 234 ka mga positibo sang Hulyo; 1,050 sang Agosto; kag 1,232 ka mga kaso sa sulod lang sang 12 ka adlaw bulan sang Setyembre.
Suno sa alkalde, makabig na ini nga “very alarming” bangud indi magnubo duha ka bulan, nagdoble ang numero sang mga kaso sa Bacolod.
