Dugang nga mga benepisyaryo sa ciudad sang Bacolod ang magabaton sang second tranche sang Social Amelioration Program (SAP) subong nga adlaw.
Sa interview sang Bombo Radyo Bacolod kay Pacita Tero, pinuno sang Department of Social Services and Development (DSSD) sa Bacolod, ginkumpirmar sini nga magapanagtag sila sang cash assistance sa mga wala nakakuha sang ila second tranche sadto bangud sa ginpatuman nga localized lockdown sa pila ka mga lugar.
Suno kay Tero natalana subong nga Lunes, Setyembre 14 tubtob 16 ang distribution sang second tranche sa masobra 3 mil pa ka mga beneficiaries.
Dugang pa sini nga kun mga dalagkuan nga barangay, posible nga tingbon nalang sa barangay hall ang distribution samtang sa mga magagmay naman nga barangay, idul-ong na lang sang DSWD personnel.
Nagpangabay naman si Tero sa third batch nga natalana hatagan sang ayuda nga maghulat-hulat lang bangud nga pananglitan ma-download na ang pondo, sarang na nila ini dayon makuha paagi sa digital ukon remittance center.
Nahibaluan nga ang kabahin sang third batch amo ang mga kwalipikado nga beneficiaries nga wala nadala sa first tranche.
Bilog nga P12,000 naman ang ila mabaton suno sa DSSD head.
