Nagtipon kaina sang udto ang mga miyembro sang Metro Bacolod Mansilingan Drivers Association (MBMDA) agud ipalab-ot sa city government sang Bacolod ang pagpangayo sang ayuda matapos gindumilian sila nga magbyahe kasunod sang pagpaidalom sang ciudad sa modified enhanced community quarantine.
Sa interview sang Bombo Radyo Bacolod kay MBMDA president Rodney Agsam Cathedral, luyag nila ipalab-ot sa lokal nga gobyerno sang Bacolod nga wala pa sila sang nabaton nga ayuda santo sa ginpahayag sang Department of Social Welfare and Development (DSWD) nga ginpaagi na sa barangay ang ayuda kag hatagan sang prayoridad ang mga drivers gani nagtipon sila sa Bangga PLDT.
Sang nagkadto si Cathedral sa barangay suno sa iya, ginatug-anan sila nga maghulat-hulat bangud wala pa sang ayuda.
Nagpanindugan man ini nga indi na mahimo nga makahulat pa ang mga miyembro sini bangud nga nagakagutman na ang ila pamilya.
Isa pa sa ginpalab-ot sini nga kun nag-arkila man ang syudad para sa libre sakay program, indi dapat jeep ang gin-arkilahan bangud indi ini patas para sa ila.
Wala lang ini nagahambal para sa mga drivers sang PUJ apang nagahambal man ini para sa mga tricycle kag trisikad drivers.
Nagpanawagan ini sa barangay nga bisan bugas nalang kun may mahatag sa ila.
Maayo lang suno diri nga bisan paano may yara sang savings sa association nila agud tigana sa pareho subong nga tinion nga kinahanglanon.
