Ginakabig sang national vice president sang Filipino Nurses United nga dako nga bulig para sa mga health care workers sa pungsod ang pagpirma ni Presidente Rodrigo Duterte sa Bayanihan 2 ukon Bayanihan to Recover as One Act.
Nakasaad sa layi nga magabaton ang Department of Health sang P3 billion para sa pagbakal sang dugang nga face masks, personal protective equipment, shoe covers, kag face shields.
Kuhaon man diri ang 13.5 billion para sa emergency employment kag compensation sang mga health workers.
Kabug-usan man nga 5 billion ang pagagamiton sa paghire kag pagtrain sang kapin 50,000 ka contact tracers.
Mangin standby fund naman para sa COVID-19 testing kag pagbakal sang bulong sa COVID-19 kag vaccines sa tion nga available na ini.
Sa interview sang Bombo Radyo Bacolod kay Eleanor Nolasco, ginpahayag sini nga dako nga kadalag-an para sa mga health care workers ang pagpirma sang nasambit nga layi.
Apang suno kay Nolasco, dako ang kulang sa pondo para sa epektibo nga pagpakig-away sang pungsod sa coronavirus disease 2019.
Suno diri, wala pa sang konkreto nga basehan nga nagaflat na ang curve sang kaso sang COVID-19 sa Pilipinas bangud wala pa sang significant nga mga nag-ayo sa balatian, baliskad sa ginpahayag sang Department of Health.
Samtang ginahulat man sang mga nurses ang dugang nga hazard pay, magluwas sa ginabaton nila nga hazard pay sa idalom sang Magna Carta for public and private health care workers.
Nagpanindugan ang national vice president sang FNU nga indi kaigo ang 1 million ka personal protective equipment (PPE) nga ginbakal sang gobyerno sa idalom sang Bayanihan 1 ukon Heal as One Act santo sa feedback nga nakuha sini nagikan sa mga nurses.
Ginpahayag man ni Nolasco nga indi kaigo ang mga ginagamit sang mga nurses ang PPE nga nagaduty sa ospital.
Suno diri, ginakulang ang PPE bangud sa kadamuon sang mga pasyente nga gina-atinder.
Ang padayon nga pagsaka sang contamination sang balatian ang nangin makatalagam na gani kinahanglan sang nagakaigo nga PPEs para sa nga health care workers.
Nagapakita lang sang nagakaigo nga pagprotekta sa mga health care workers ang paghatag sang nagakaigo nga personal protective equipment (PPE).
Nagpanawagan man ini sang transparency sa gobyerno kun sa diin kag sin-o na ang nakabaton sang ginbakal nga PPEs.
