Liwat nga ginpanindugan sang alkalde sang Bacolod nga desisyon sang national inter-agency task force nga ipaidalom ang ciudad sa modified enhanced community quarantine (MECQ) santo sa ila evaluation kag statistics sang COVID cases sa ciudad.
Sa interview sang Bombo Radyo kay Mayor Evelio “Bing” Leonardia, aminado ini nga ang pagpaidalom sang ciudad sa MECQ ang nagtuga sang madamo nga mga reklamo nagikan sa mga pumuluyo.
Gani gin-athag sini nga ang national inter-agency task force (NIATF) ang nagadetermine sang quarantine status sang kada local government unit kag indi ang mga lokal nga opisyales.
Suno sa iya, sang Setyembre 7 sang gab-i, sang gin-anunsyar sang NIATF nga ipaidalum ang Bacolod sa MECQ, nagameeting man sila nga mga opisyales kag nakibot man ang mga ini nga naglain na gali ang status sang ciudad bangud masami nga petsa 15 ukon 30 ini gina-implementar.
Suno diri, makapila na ka beses nga nagsapol ini kaupod ang business sektor kag religious leaders kun sa diin nag-ayo ang mga doktor nga ipaidalum sa ECQ ang Bacolod City apang wala ini gin-aprubahan sang national IATF.
Suno sa alkalde, luyag sini nga mangin maayo ang health condition sa ciudad kag ginapanumdum man sini ang ekonomiya apang kun maipit sa duha suno kay Leonardia, klaro gid kun diin ang dapat pasulabihon.
Suno diri, nakit-an sang national IATF ang sitwasyon sa Bacolod kun sa diin “very alarming” na ang masobra 100 ka mga kaso kada adlaw sa bulan sang Setyembre gani ila gindesisyunan nga ipaidalum ini sa MECQ.
Gindugang man sini nga yara sa idalum sang restrictions sang nasambit nga quarantine status ang pagpauntat sang public transport kag nagapati man ini nga kun pabay-an lang nga magbyahe ang pampubliko nga mga salakyan, mapinagusto na lang ang mga tawo sakay kag daw wala lang gihapon sang restrictions.
Gani nagapangabay ini nga magsakripisyo lang anay sang kadali kag magkooperar agud matapna na ang virus sa ciudad sa madali nga panahon.
