Pila ka mga persona ang nagpadulong sa Bacolod Police Station 2 agud ireklamo ang ginaalegar rice investment scam.
Suno kay Mia Yosores, isa ka negosyante kag residente sang Brgy. Bata, Bacolod City, kabug-usan nga P1.8 million ang iya nainvest sa mga suspetsado nga sanday Jennifer Nierves kag Krizia Rhea Gonzaga.
Suno kay Yosores, nakit-an sini sa social media ang post ni Nierves nahanungod sa isa ka negosyo sang bugas kun sa diin kun mag-invest sang P300,000, sarang nga makakuha sang P30,000 sa sulod lang sang tatlo ka adlaw.
Hulyo 23 sang una ini nga nag-invest sang P500,000 tubtob nga nagsige-sige na ini dugang sang kwarta.
Suno sa iya, apisar nga may pagpangduha-duha sa posibilidad nga scam ang nasambit nga investment, nagpati ini gihapon madamo sang mga persona nga naga-invest.
Suno diri, sa dokumento nga ila ginpirmahan, “debtor” ang nakabutang sa ila pangalan apang wala na lang niya ini ginpadalman bangud nakabaton man ini sang payout.
Natingala nalang ini sang may mga delays na sa payout sang Hulyo 31 kag Agosto 7.
Gindugang man sini nga may mga bounced check nga gin-issue sa ila.
Magluwas sa iya, pila pa ka mga persona ang nakuhaan sang milyones nga kwarta kun sa diin indi maglab-ot sa katunga lang ang nabalik sa mga ini.
Suno kay Yosores, indi magnubo sa 110 ka mga persona ang nascam sang mga suspetsado gani nagapanindugan ini bangud luyag sini kag sang iban pa nga mauli ang ila nga kwarta.
Sa karun, nagapadayon pa ang imbestigasyon sang kapulisan.
