Natalana nga magpagwa sang executive order si Mayor Evelio “Bing” Leonardia tuhoy sa temporaryo nga pagpasira sa mga sementeryo sa Bacolod City sa Oktubre 31 tubtob Nobyembre 3.
Sa ginpagwa nga statement ni Leonardia kahapon, iya naintindihan ang rason kun ngaa ginpahayag ni Department of Interior and Local Government (DILG) Secretary Eduardo Año nga kinahanglan siraduhan ang mga pampubliko kag pribado nga memorial parks kag patyo sa tigkalalag.
Suno sa alkalde, apisar nga ginapahanugutan nga makabisita ang mga pumuluyo sa ila mga minatay antes ang Oktubre 31 ukon pagkatapos sang Nobyembre 3, kontrolado gihapon ang numero sang mga magabisita.
Gindugang man sini nga para man sa kaayuhan kag kaluwasan sang publiko ang pagpadumili sa mass gatherings, nga masami nga nagakatabo sa pag-obserbar sang “Pista Minatay.”
