Nagpaathag si Executive Assistant to the Mayor Samuel Montoyo nahanungod sa bayranay sa mga drivers nga ginhire sang ciudad para sa Libre Sakay Program sang Bacolod City government.
Sa interview sang Bombo Radyo kay Montoyo, ginpahayag sini nga magapadayon ang nasambit nga programa tubtob Setyembre 30 kun sa diin 48 ka mga public utility jeepneys ang magabyahe sa pito ka ruta kada adlaw agud may masakyan ang mga essential kag heath workers sa tunga sang modified enhanced community quarantine (MECQ) nga ginapatuman.
Suno kay Montoyo, P150 ang bayad sa mga drivers kada one-way trip samtang P300 naman kun round trip.
Sa isa ka adlaw suno diri, 10 lang ka round trips ang maximum nga ginhatag sa mga drivers gani makabaton ang mga ini sang P3,000 kun makabyahe sang 10 ka round trips.
Apang magadepende man sa ila asosasyon kun magabulos-bulos ang mga ini ukon may schedule ang tagsa ka mga driver sa pagmaneho sang jeep sa isa ka adlaw.
Suno sa executive assistant, ila na ginatugyan sa asosasyon ang pagplastar sa mga drivers subong man sa pagsumiter sang mga pangalan sini sa Bacolod Traffic Authority Office (BTAO) nga nagarekord man kun pila na ka trips ang nabyahe sang tagsa ka driver.
Gindugang man sini nga adlaw-adlaw ang ila bayranay kun sa diin ang sweldo para sa Lunes ang ila mabaton sa Martes agud may panggasto man ang mga ini adlaw-adlaw.
Suno kay Montoyo, tinutuyo sang Libre Sakay Program nga maserbisyuhan ang mga essential workers subong man nga mabuligan ang mga drivers nga nawad-an sang pangabuhian bangud sa COVID-19 pandemic.
