245 ka mga locally stranded individuals (LSI) ang magaabot diri sa probinsya sang Negros Occidental subong nga adlaw.
Suno kay Dr. Zeaphard Gerhart Caelian, pinuno sang Provincial Incident Management Team, nakabaton sang 117 ka mga LSI ang probinsya kahapon samtang nagdangat naman sa 57 ang returning overseas Filipinos (ROF) nga nag-abot.
Samtang subong naman, ginalauman nga magaabot ang 245 ka mga Negrosanon nga nastranded sa Manila.
Pagasugaton ang mga ini kun makaabot sa BREDCO Port.
Aminado naman si Caelian nga malapit na nga mapuno ang pila ka mga Quarantine Facility sa pila ka mga local government units (LGU) tuga sang mga nagsulod nga LSI nagikan sa Cebu.
Nagpaathag naman si Caelian nga kun wala na sang bakante nga mabilin sa mga LGU, igabutang naman ang mga residente sa Quarantine Facility sang probinsya nga nahamtang sa Silay City, EB Magalona kag Cadiz City.
Samtang kun makabakante naman ang mga Quarantine Facility sa mga LGU, gilayon naman ang mga ini nga igatransfer.
Nagapabilin naman ang koordinasyon sang probinsya sa mga nasakupan sini nga mga LGU.
Amat-amat naman nga magapasulod ang probinsya bangod sa pagligwa sang mga nagapauli matapos ang nangin moratorium sa mga LSI.
Panugyan naman ni Caelian nga mas maayo kun hibaluon anay sang national Inter-Agency Task Force (IATF) kun pila pa ang bakante sa mga quarantine facility kag amo lang ang ipadala.
