Ginaugyunan sang doctor sa syudad sang Bacolod ang ginaduso sang pila ka mga doctor nga paggamit sang bulong nga hydroxychloroquine (HQC) bilang preventive measure batok sa COVID 19.
Nahibaluan nga may yara sang grupo sang mga doctors nga nagarekomendar sang paggamit sang hydroxychloroquine (HCQ) nga isa ka oral prophylaxis bilang preventive measure batok sa coronavirus disease 2019 (Covid-19).
Suno sa mga Concerned Doctors and Citizens of the Philippines, ang HCQ ang epektibo, hilway, indi mahal kag available na nga intervention nga nagafocus sa temprano nga pagbulong kag home quarantine para sa kadamuan nga mga pasyente kag prophylaxis para sa high-risk individuals kaangay sang mga frontliners.
Sa interview sang Bombo Radyo Bacolod kay Dr. Vicente Iturriaga, ang doctor nga nakapaayo sa iya pasyente paagi sa oral medicine, ginpahayag sini nga pabor siya sa paghatag sang hydroxychloroquine sa iya pasyente apang dapat may precaution.
Suno kay Iturriaga, ang bulong ang may side effect nga arrhythmia ukon indi regular nga pagpitik sang tagipusuon.
Ang mga pasyente nga may sakit sa tagipusuon ang indi sarang mahatagan sang bulong bangud mahimo nga maheart-attack ini kag indi man ini mahimo nga ihatag sa babayi nga nagabusong.
Ginpahayag man ni Iturriaga nga ang bulong nga hydroxychloroquine ang sarang nga mahatag sa mga healthy nga mga pasyente kaangay sang mga young adults.
Suno pa diri, ang nasambit nga bulong ang nagatapna sang paglala sang sintomas sang COVID-19 sa early stage kag sa mild to moderate nga sintomas.
Santo man sa personal sini nga panan-awan, antes maghatag sang bulong nga hydroxychloroquine dapat magpaidalom sa electrocardiography (ECG) agud mahibaluan kun normal ang heart rate.
Samtang, ginpahayag man ni Iturriaga nga ang zinc ang may dako nga bulig agud mabakod ang immune system kag malikawan nga matapikan sang coronavirus disease.
