Nagpanawagan sang hustisya ang pamilya sang 61 anyos nga lalaki sa Barangay Malingin, Bago City nga nagsuicide sang tinalikdan nga adlaw.
Sa interview sang Bombo Radyo Bacolod kay Merlinda Mariñas, bayaw sang nagpanginmatay nga si Ricardo Mariñas, sang Setyembre 9, mga alas 07:00 sang aga may duha ka tanod nga nagkuha sa biktima sa iya payag nga ginkilala sini nga kanday Franco Villesa kag si “Simbus”.
Samtang, nagalakat sila sa dalan, ginaalegar nga ginkastigo na ini sang mga tanod bangud sa alegasyon nga nangrape ini sa ginabanta pulo ka tuig nga bata nga babayi.
Suno kay Merlinda, ginpahayag ni Ricardo nga nagpalangdulom na ang panulok sini gani wala na nakilal-an ang nagkastigo sa iya.
Gintawgan man nila ang mga pamilya nila sa Kanlaon bangud sa natabo kag ginhingyo pa ang mga police nga sa headquarters nalang dal-on ang biktima bangud sa akusasyon sa iya nga nangrape ini apang wala man ini gindala kag ginpapauli na ini sa iya payag.
Matapos nga magreklamo sang pagpangkastigo, nag-atubangay man ang tanod kag ang biktima sa barangay sang tinalikdan nga Martes kag nag-aregluhay bangud nagpangayo man sang pasaylo ang mga barangay tanod.
Antes maghikog si Ricardo sang Huwebes, ginsugo sini ang iya asawa nga manukot sang ginpautang nga karne sang karabaw.
Nakibot naman ang asawa sini sang nagpauli nga ginbitay na sini ang iya kaugalingon.
Nagtungtong ini sa duha ka bangko agud mabitay ang kaugalingon gamit ang kalat nga ginhigot sa iya liog.
Ginalantaw man ni Merlinda nga bangud sa kahadlok kag kakulba ni Ricardo nga patyon ini gani siya ang naghikog.
