Wala pa sang lead nga ginasundan ang mga kapulisan angot sa pagtiro sa isa ka lalaki sa atubang sang Trinity Christian School sa Villa Angela Subdivision, Barangay Villamonte, ciudad sang Bacolod kagab-i.
Sa interview sang Bombo Radyo Bacolod kay Police Lt. Col. Ariel Pico, tagpamaba sang Bacolod City Police Office, wala pa natumod sang kapulisan ang motibo sa pagtiro sa biktima nga ginkilala kay Mark Anthony Cubos, 37-anyos kag residente sang Purok Kamoteng Kahoy, Barangay 4, Bacolod City apang may mga sensitibo na sila nga impormasyon sa karun nga indi pa mahimo nga mapalayag sa kahanginan.
Suno kay Pico, ginahulat pa sini ang medical bulletin sang biktima nga padayon nga ginabulong sa pribado nga ospital sa syudad.
Suno kay Pico, indi pa man sini makompirmar kun may kaangtanan sa iligal nga druga ang pagtiro sa biktima bangud nagapadayon pa ang imbestigasyon.
Madumduman nga sakay ang biktima sa Toyota Vios nga gray sang ginpaarakan sang luthang sang wala pa makilal-an nga mga suspetsado nga sakay naman sa Toyota Innova nga pula kun sa diin nakaangkon sang igo sang bala sa guya kag sa dughan si Cubos.
Apang nakatigayon pa ini nga makamaneho padulong sa check-up point sa Helvetia Heights Subdivision, Barangay Villamonte agud magpangayo sang bulig.
Santo sa inisyal nga imbestigasyon sang kapulisan, may yara sang 10 ka igo sang bala ang kilid nga bahin sang salakyan ni Cubos kag may duha naman sa atubangan.
Nagalaom man si Pico nga mapadasig ang imbestigasyon kag mahibaluan ang tawo sa likod sang pagtiro sa 37 anyos nga biktima.
Nagapadayon pa ang hot pursuit operation sang Bacolod City Police Station 4 sa pagpanguna ni Police Major Charles Gever bangud may yara na sila sang persons of interest.
