Ginpatpat sang konsehal sa syudad sang Bacolod ang mga kaso nga sarang atubangon sang isa ka persona kun indi magkooperar sa gobyerno sa mga ginapatuman nga pagsulundan sa pagpakigbato sa coronavirus disease 2019.
Sa interview sang Bombo Radyo Bacolod kay Atty. Renecito Novero, ginkompirmar sang konsehal sang Bacolod nga handa ang mga katapo sang Integrated Bar of the Philippines-Negros Occidental Chapter nga magbulig sa syudad sa pag-address sa mga problema nga nagakinahanglan sang legal counsel matapos nga magpakighun-anon sa Emergency Operation Center (EOC) Task Force.
Ginpahayag sini nga may salabton sa kasuguan ang sin-o man nga wala nagakooperar sa gobyerno agud pakigbatuan ang coronavirus disease 2019 bangud nakasaad ini sa Section 9 sang RA 11332 ukon An Act Providing Policies And Prescribing Procedures On Surveillance And Response To Notifiable Diseases.
Nakasaad sa section 9 ukon Probihibited Acts sang RA 11332 sa paragraph D and E ang non-cooperation of persons and entities that should report and/or respond to notifiable diseases or health events of public concern; kag non-cooperation of the person or entities.
Suno kay Novero, ang mga kaangay sang nagpakigbahin sa mass testing sang syudad nga wala nagbutang sang husto kag nagakaigo nga impormasyon sa Confidential Information Sheet ukon CIF ang may criminal liability santo sa nakasaad sa layi.
Ginpahayag man ni Novero nga ang mga kompanya nga nagtago sang mga empleyado nga nagpositibo ang sarang makasuhan kag marevoke ang license to operate sini kasubong man ang mga doctor nga wala nagpanugid nga positibo ang mga ini sa balatian.
Ang sin-o man nga mapamatbatan nga guilty ang multahan sang 20 tubtub 50 mil pesos ukon mapriso sang isa tubtub anom ka bulan ukon kombinasyon sang multa kag pagkapriso.
