Pila ka mga armas ang narekober sang 62nd Infantry (Unifier) Battalion sang Philippine Army kasunod sang engkwentro batok sa mga katapo sang Leonardo Panaligan Command-New People’s Army (LPC-NPA) terrorist group sa Sitio Anatuling, Barangay Budlasan, Canlaon City, Negros Oriental.
Matapos ang apat ka oras nga bakbakanay, gindeklarar ni 62nd IB commander Lieutenant Colonel Melvin Flores ang pursuit operation agud malagas ang reported nga presensya sang armado nga grupo kag pagkuha sang mga armas sa Sitio Bungao, Brgy. Trinidad, Guihulngan City.
Ang tropa ang nakaengkwentro sang kapin pito ka mga rebelde nga ginapatihan miyembro sang Samahang Yunit Propaganda (SYP) Platoon, CN1, KR-NCBS sa Sitio Anatuling, Brgy Budlasan, Canlaon City.
Ang pagbayluhanay sang lupok ang nagdugay sang kapin lima ka minutos kag pagkatapos sini, ang mga rebelde ang nagpalagyo sa nagkalain-lain nga direksyon nga ginaguyod ang mga nasamaran nila nga kaupdanan samtang wala naman sang nasamaran ukon napatay sa bahin sang gobyerno.
Natigayon nga makuha sang tropa ang isa ka calibre .45mm pistol; isa ka calibre .22 mm revolver; isa ka magazine nga naassemble para sa .45mm pistol; walo ka rounds sang ammunition, nagkalain-lain nga medical paraphernalia kag mga bulong; pito ka mga backpacks nga nagaunod sang subversive documents nga may high intelligence value, personal belongings kag CPP-NPA terrorist flag.
