Aminado ang medical center chief sang Corazon Locsin Montelibano Memorial Regional Hospital (CLMMRH) nga ginakulang na sila sang isolation facility.
Sa interview sang Bombo Radyo Bacolod kay Dr. Julius Drilon, magabukas pa sila sang reserved unit matapos nga napuno na ang allocation para sa neonatal intensive care kag obstetrics isolation rooms.
Ginpahayag man sini nga may allocated nga 90 beds ang Covid areas sang ospital kag may naadmit na nga 62 ka mga COVID patients.
Ginabanta naman nga sa October 1, magasaka na ang bed capacity sang Covid area sang ospital sa 104 kag dugangan pa ini sang 20 ka mga beds sa una nga semana sang Oktubre.
Samtang ang non-covid patients ang ginabanta nga may kabug-usan nga 140 tubtob 150 ka mga pasyente nga nabutang sa regular wards.
Ang iban sini ang naghalin sa isolation areas nga nagpaidalom sa RT-PCR Test apang nagnegatibo ang resulta kag gindistribute sa nagkalain-lain nga areas kaangay obstetrics, pediatrics kag internal medicine.
Suno kay Drilon, nakadepende pa sa condition sang Covid patients ang kadasigon sang pagrelease sang ospital sa iya.
Ginpakigbahin man sini nga nagataas man ang numero sang consultation sang ospital sa may mga sintomas sang nasambit nga balatian.
Maakomodar man nila ang mga Covid positive patients apang problema sang ospital ang isolation areas.
