Ginpahayag sang pinuno sang Department of the Interior and Local Government (DILG) Bacolod nga kun kumpleto ang requirements kag nakapasar sa minimum qualification ang isa ka aplikante para sa contact tracer, gilayon nila ini nga irecommend sa regional office.
Sa interview sang Bombo Radyo kay DILG Bacolod City Director Ma. Joy Maredith Madayag, malapit 200 ka mga persona nga ginalakipan sang mga nurses, medical technologist, criminology graduates kag OFWs nga nawad-an sang trabaho ang nag-apply bilang contact tracer sa ahensya.
Suno sa iya, nakasugod na sila interview sang Lunes kag apisar nga nagcut off na sila sang application sang tinalikdan nga semana, kun may luyag mag-apply, gina-accommodate lang nila gihapon.
Suno kay Madayag, face to face and interview nga ila ginpatigayon halin sang Lunes kun sa diin anum ka mga staff ang na-assign diri apang gina-obserbar man ang health protocols.
Suno sa DILG Head, subong nga adlaw, igasumiter na ang impormasyon sang mga aplikante sa regional office kag basta kumpleto lang ang mga requirements, ila ini irecommend kag ang regional director na ang magadesisyun kun mahire ang mga ini.
Suno diri, sa Biyernes magapatigayon sang deliberasyon ang regional office sa mga nag-apply.
Gindugang man sini nga sa Bacolod City man iga-assign ang mga contact tracers nga mahire.
Nahibaluan nga masobra P18,000 ang pagabatunon nga sweldo sang contact tracers kada bulan apang contractual lang ang mga ini.
Sila ang magasugod ubra sa bulan sang Oktubre tubtob Disyembre apang posible pa nga ma-extend kun indi magnubo ang kaso sang COVID sa Pilipinas.
