Dako ang pagpasalamat ni Bacolod City Lone District Congressman Greg Gasataya kay Department of Social Services Secretary (DSWD) Rolando Bautista sa pagsabat sa request sini nga malakip ang ciudad sang Bacolod sa mahatagan sang Emergency Subsidy.
Sa interview sang Bombo Radyo kay Gasataya, iya ginpahayag nga nagrequest ini sang September 8 sa DSWD nga himuon nga prayoridad ang Bacolod sa nahinambitan nga Emergency Subsidy bangod yara karon ang ciudad sa idalom sang Modified Enhance Community Quarantine (MECQ).
Suno kay Gasataya, nalakip sa sulat sa iya sang DSWD Central Office nga ang mga low income families kag ang mga apektado sa MECQ ang mangin benepisyaryo sang nasambit nga pondo nga nagikan sa Bayanihan Act 2 nga napasar sa Kongreso sang damlag lang.
Gindugang man sini nga ang DSWD na ang bahala sa pag-anunsyo sang guidelines kag pagproseso sa kun paano maka-avail ang mga pumuluyo sang Bacolod ilabi na ang yara sa low income families.
Ang ahensya man ang maga-assess kun sanday sin-o ang kwalipikado nga mangin benepisyaryo kag sila man ang magarelease sang kwarta.
