Ginkumpirmar sang provincial director sang Department of the Interior and Local Government sa Negros Occidental nga nagabaton na ang ahensya sang college level nga mga aplikante agud mangin contact tracers.
Sa interview sang Bombo Radyo kay Atty. Ferdinand Panes, ginpahayag sini nga sa 1,000 ka mga aplikante nga quota sang rehiyon, 324 pa lang ang nakapasa sang application samtang masobra 220 pa lang ang ila nainterview kag natalana nga iendorso sa regional selection board para sa final action.
Aminado si Panes nga gamay lang ang nagresponde sa ila panawagan kag nagapati ini nga posible ini ang bangud sa late na nila nga pag-anunsyar.
Suno diri wala pa man nakaset sang deadline bangud posible nga may yara pa sang next batch kag kun sang tinalikdan, kinahanglan nga Bachelor’s Degree holder gid ang aplikante, suno sa provincial director, sarang na nga maka-apply ang mga college level apisar nga wala nakagraduate.
Gani, gina-engganyo sini ang mga luyag nga magtrabaho nga mag-apply na bilang contact tracer agud makabaton man sang sweldo kag makabulig sa gobyerno.
Kinahanglan lang nga magpasa sang application letter, transcript of record, letter of intent, resulta sang drug test kag NBI clearance via email sa ahensya ukon ihulog ini sa drop box sang ila opisina.
Nahibaluan nga masobra P18,000 ang pagabatunon nga sweldo sang contact tracers kada bulan apisar nga contractual lang ang mga ini kag magasugod trabaho sa bulan sang Oktubre tubtob Disyembre apang posible pa nga maextend kun indi magnubo ang kaso sang COVID sa Pilipinas.
