Nagdangat sa 31 ang successful nga mga blood donors sa ginpatigayon nga Dugong Bombo, ang bloodletting activity sa partnership sang Philippine Red Cross Bacolod-Negros Occidental Chapter, Bombo Radyo Bacolod kay Murcia Municipal Health Office sa Barangay Alegria, Murcia, Negros Occidental kahapon.
Duha ka 55 anyos ang makabig nga pinakagulang sa 31 nga mga donors kag 19 anyos naman ang narecord nga pinakabata.
Suno kay Dra. Anna Marie Quilantang, Medical Officer kag Manager sang Blood Center, bilang representante sang Philippine Red Cross, nagpasalamat ini sa Barangay Alegria kag sa punong barangay nga si Newton Tormo sa pag-upod sa programa.
Nagpasalamat man ini sa in-charge sang bloodletting activity sang Municipal Health Office sang Murcia nga si Alan Benjamin kag sa Bombo Radyo Bacolod nga nagpalab-ot man sang bulig.
Suno kay Quilantang, mabudlay ang pagpangita sang dugo kag indi man magpatigayon sang blood letting activity ang mga local government units (LGU) bangod sa pandemic.
Suno diri, in demand ang dugo bangod sa madamo ang mga pasyente ang nagakinahanglan.
Nagpasalamat naman si Punong Barangay Newton Tormo sang Barangay Alegria, Murcia nga sa ila lugar ginpatigayon ang Dugong Bombo.
Mismo si Tormo ang isa sa mga nagtambong sa bloodletting activity kag nagpasalamat ini nga nahatagan sang kahigayunan nga makabulig.
Suno diri, nagpatigayon sila sang rekorida agud makaganyat sang blood donors apisar sang pandemic.
Ginmeeting man ang mga opisyales sang barangay agud nga mapalab-ot sa mga pumuluyo ang pagahimuon nga blood letting activity.
Apisar nga madamo sang mga dugang nga pagpatuman kadungan sang pandemic, nagpasalamat ini sa mga pumuluyo nga nagpadulong gihapon sa venue agud nga magpakuha sang dugo.
Emosyonal naman nga ginpakigbahin sang blood donor sa Dugong Bombo 2020 nga si Remia Jiva, 39 anyos nga luyag lang sini nga magdonar sang dugo sa tinutuyo nga makabulig sa iban nga tawo.
Pagpang-uling kag pagpamanggas ang palangabuhian ni Jiva.
Samtang naghatag gid ini sang tion agud nga makadonar sang dugo subong nga adlaw sa ginpatigayon nga programa kag ini na ang ikawalo nga tion nga nagdonar ini sang dugo.
Samtang, nagalaom ang alkalde sang EB Magalona nga madamo ang magapartisipar sa bloodletting activity nga patigayunon sa nasambit nga banwa bwas nga adlaw, Setyembre 26, apang lauman nga indi gid magdamo ang tawo bangud man sa pandemic.
Sa interview sang Bombo Radyo kay Mayor Marvin Malacon, nagpasalamat ini sa Bombo Radyo subong man sa Philippine Red Cross sa pagsuporta sa programa sang banwa.
Suno diri, apisar nga may ginapangatubang nga COVID-19 pandemic, indi dapat mag-untat sa pagkampanya sang pagdonar sang dugo ilabi na nga nagasaka sa karun ang demand dini.
Suno sa alkalde, nagahatag man sila sang foodpacks sa mga indibidwal nga nagdonar sang dugo apang ginalauman sini ini indi mangin tam-an kadamo bangud may gina-obserbar nga health protocol.
Suno sa iya, apisar nga covered court ang pagahiwatan sang programa, indi sini luyag nga magdamo ang tawo gani kinahanglan nga iobserbar gid ang social distancing kag iregulate sang maayo ang flow sang mga tawo.
Gindugang man sini nga ila na gin-evaluate ang mga health workers nga magapartisipar sa bloodletting activity.
Gina-apresyar naman sini ang mga nagadonar sang dugo bangud suno kay Malacon dako gid ang kontribusyon sini sa iban nga tawo ilabi na sa mga nagakinahanglan.
Sa karun, suno sa alkalde, may yara sang 82 ka mga kaso sang coronavirus sa EB Magalona kun sa diin tatlo ang nagtaliwan samtang 40 naman ang yara sa quarantine facility.
