Ginahanda na ang kaso nga ipasaka batok sa hinablos nga nagpanglabo sa iya nga tiyo sa Purok 5, Barangay Asia, banwa sang Hinobaan nagligad nga Miyerkules sang gab-i.
Ginkilala ang biktima kay Jerry Elarcosa, 58-anyos samtang ang suspetsado naman amo si Jose Hinggaray, 41-anyos.
Sa interview sang Bombo Radyo Bacolod kay P/Lt. Chrysler John Ledesma, deputy chief of police sang Hinobaan Municipal Police Station, ginpahayag sini nga nagpadulong nga hubog si Hinggaray sa balay sang biktima kag may dala nga bolo kun sa diin iya naka-lalis ang iya tiya nga si Vilma.
Nahibaluan nga si Vilma kag ang amay sang suspetsado ang mag-utod.
Suno kay Ledesma, nagtalikod na ang tiya kay Hinggaray kag wala na nagbais pa kag nagpadulong ini sa kusina kun sa diin nagakagod sang lubi si Elarcosa.
Wala natalupangdan sang mga ini nga nagsunod man sa kusina si Hinggaray kay hinali nalang nga ginlabo gamit ang bolo ang iya nga tiyo.
Nakaangkon sang pilas sa natuo nga guya ang biktima.
Suno kay Ledesma, may madugay na nga hiligut-anon ang suspetsado sa biktima bangud gina-alegar sini nga may relasyon si Elarcosa sa iya nga iloy.
Sa karon padayon pa nga ginabulong sa ospital ang biktima samtang nakahunong naman sa custodial facility si Hinggaray para sa nagakaigo nga disposisyon.
