Nagalaom ang 31-anyos nga iloy sa Bago City, Negros Occidental nga makontak niya liwat ang magulang nga nagpadulong sa Manila , 24 na ka tuig ang nakaligad kag wala na gid nabalitaan tubtub subong.
Si Ester Rose Bermudez Insuelo sang Purok Masinadyahon, Barangay Atipuluan, Bago City, Negros Occidental ang ikalima sa anom ka mga mag-ulutod samtang subang naman ang ginapangita sini nga utod.
Ang subang nga si Roco Bermudez ang nagpadulong sa Sta. Rosa, Nueva Ecija sadtong 1996 sa edad nga kinse anyos agud nga magtrabaho, samtang pito ka tuig naman sadto si Ester Rose.
Madamo ini sang kaupod sa pagbyahe kalakip na ang pila ka mga pakaisa, apang nagtupa sila sa nagkalain-lain nga amo.
Suno kay Ester Rose, nakabalik na ang mga kaupod sini nga naglakat apang wala na nagbalik ang magulang.
Ginkadtuan man ini sang tiya nga si Virgenia Bermudez sang 1998 apang nagpamalibad ini nga magpauli bangod maayo man ang sitwasyon sini kag mabuot ang mga amo.
Natukiban sang tiya nga nagatrabaho ini bilang tagabantay sang bebe sa amo nga empleyado sa City Health.
Sumugod sadto, wala na ini sang komunikasyon sa utod.
Sa karun, may-ara na sang duha ka mga kabataan nga babayi si Ester Rose nga naga-edad 14 kag 9 ka tuig samtang wala naman sini mahibaluan kun may pamilya na ang magulang sa Nueva Ecija.
Suno diri, gintinguhaan naman sang mga ini nga pangitaon sa Facebook ang magulang apang wala gihapon makita.
Nagalaom si Ester Rose nga pinaagi sa Bombo Radyo, makakita ini sang paagi agud nga makita ang magulang ukon bisan makakuha nalang sang contact agud nga mahibaluan kun maayo ang kahimtangan sini.
Sarang ini nga makuntak sa numero nga 09567406739 ukon 09071157451.
