Gin-untat kaina sang Department of Social Services and Development sang Bacolod ang paglista sa mangin benepisyaryo sang financial assistance nagikan sa Department of Social Welfare and Development.
Kaagahon pa lang, napuno sang tawo ang palibot sang Bacolod Government Center bangud sa paghingamo nga makauna sa listahan.
Sa interview sang Bombo Radyo Bacolod kay DSSD head Pacita Tero, gincancel ang listahanay bangud indi na makontrol ang tawo nga nagtipon sa BGC.
Suno kay Tero, may yara na sila sang gin-establishar nga plano sa pagpanagtag sang kabug-usan nga P5 milyon nga cash grant sa idalom sang Aid To Individual In Crisis Situation (AICS) nga regular nga programa sang Department of Social Welfare and Development (DSWD).
Suno kay Tero, ginalantaw nila nga sa Lunes, 100 lang ka mga benepisyaryo ang ila interviewhon nga nagikan sa nagkalain-lain nga sector nga apektado sang pandemya.
Ang ginabasehan sang ila assessment amo ang anay sweldo sang mga apektado.
Mahimo nga halin sa P1500- P5000 ang mabaton sang mga benepisyaryo apang hatagan sang prayoridad ang mga katapo sang transport sector.
Ginalantaw man nila nga iadjust na lamang ang cash aid nga mabaton sang mga benepisyaryo sang programa.
Suno kay Tero, naayawan man sila ka paathag sa mga tawo kaina apang wala naghalin tubtub nga ang pulis na mimso ang nagpaathag sa ila kag boluntaryo na nga naghalalin.
Ianunsyar naman nila kun san-o ang pagpanagtag sang cash aid bangud istoryahan pa nila ang strategy agud maobserbar ang basic health protocols against sa COVID-19.
