Natalana nga pasakaan sang tangkas-tangkas nga kaso ang anak nga naghostage sang kaugalingon sini nga iloy sa Yapquina Street . Brgy. 4, Victorias City, Negros Occidental, kagab-i.
Sa interview sang Bombo Radyo Bacolod kay Police Lt. Col. Eduardo Corpuz, hepe sang Victorias City Police Station, mga ala-1:00 sang kaagahon nakuha sang mga police ang suspetsado nga ginkilala kay Andrew Gracia, isa ka seafarer matapos ang kapin anom ka oras nga pag-negosyar sang kapulisan.
Suno kay Corpuz, napaslawan sa patag sang paghigugma ang suspetsado bangud indi na ini pagbalikan sang iya anay nobya kag nakaeksperyensya ini sang depression.
Suno sa hepe, nakatigayon nga makapalagyo ang iloy sini nga ginkilala kay Luisa Gracia sang ginwas-ag na sang suspetsado ang kalan-an kag tubig sini.
Antes pa ang hostage drama, manyapon kuntani ang mag-iloy apang nagsaka sa ikaduha nga panalgan ang suspetsado kag ginkuha ang remington rifle sini kag ginpalupok sang tatlo ka beses kag gin-alegar man nga nakagamit ini sang iligal nga druga.
Agud nga makaoperate ang kapulisan, ginpatay ang suga sa palibot sang balay bangud napalibutan ini sang CCTV camera kag makita ang mga tawo sa gwa sang balay.
Wala naman nagbalibad ang suspetsado sang naggwa ini sa balay kag nag-upod man sa police matapos ang pila ka oras nga negosasyon.
Nakuha sa paghinakop ni Gracia ang mga bala sang .22 caliber kag .38 caliber live ammunitions, isa ka heat sealed transparent sachet sang suspected shabu, kag remington rifle.
Sarang nga mangatubang sang kaso nga paglapas sa RA 9165 ukon Comprehensive Dangerous Drugs Act of 2002; RA 10591 ukon Comprehensive Firearms and Ammunition Regulation Act kag Alarm ang Scandal ang suspetsado apang nakadepende pa sa piskal ang ipasaka nga kaso.
