Aminado ang mga katapo sang Department of Social Services and Development nga natingala ang mga ini kun ngaa aga pa nga nagtilipon ang mga pumuluyo sa gwa sang Bacolod Government Center kahapon.
Suno kay City Administrator Em Ang, nagbilin na si DSSD head Pacita Tero sang numero sa encharge nga pulis agud nga ihatag lang sa 100 ka mga benepisyaryo.
Naglibog naman ang mga ulo sini kun ngaa gab-i palang nagpadulong na sa BCG ang mga residente kag didto na nagpaaga gani naginutok sa lugar pagkaaga.
Suno kay Ang, wala naman sang nakahibalo kun sa diin naghalin ang impormasyon kag nagapati ini sang posibilidad nga gin prank lang ang mga residente kag naghambal nga magpadulong sa lugar bangod may ginapanghatag.
Indi naman luyag ni Ang nga masulit ang kaangay nga insidente nga nagtuga sang mass gathering kag indi na masunod ang mga health protocols kaangay sang pagsuksok sang facemask kag faceshield nga nakita sini nga tuman ka delikado.
Magapangita naman ang mga ini sang paagi, pinaagi sa Emergency Operation Center agud nga indi na masulit kag malikawan ang pagdumog sang mga tawo.
Pagatinguhaan man sang EOC nga ma buksan na ang ekonomiya sa labing madali nga panahon pinaagi sa pagpanubo sang kaso sang COVID-19.
Samtang ginpahayag naman ni Ang nga wala pa ma-anunsyar kun ano ang mangin status sang ciudad pagdangat sa Oktubre 1.
Apang hugot naman ang pagpati sini nga manaog na ang community quarantine restrictions sang ciudad.
