Gin-adopt sang Bacolod City Government ang Contact Tracing System sang South Cotabato kag gincustomize lang ini nga karun gintawag “BaC-Trac” ukon Bacolod Contact Tracing System.
Ang ini nga sistema ang libre para sa tanan, accessible kag indi na ginakinahanglan sang smart phone, internet kag bluetooth.
Suno kay City Administrator Em Ang, madamo naman nga mga software developer ang nag-offer sang contact tracing application sa ciudad apang kalabanan sa mga ini ang nagakinahanglan nga may bluetooth kag internet connection.
Nakita naman nga indi ini aplikable para sa mga pumuluyo sa Barangay nga wala sang internet ukon wala sang bluetooth.
Samtang ang BaC-Trac naman ang magahatag sang QR Code sa kada pumuluyo nga magaparehistro nga sarang naman maprint kag matago sa mga wallet.
Isa lamang ka QR Code ang isa-issue sa kada persona.
Iga-scan naman sang mga guardya sang isa ka establishimento ukon Government Offices ang mga QR Code kun sa diin makita sini ang data sang persona kag madetect kun positibo ini sa COVID-19.
Ang system ang naka-access sa tanan nga downloaded data nagikan sa mga molecular laboratories.
Kun nakadownload naman sa mga smart phone sang application, sarang man ini magpahibalo kun may-ara sang malapit nga positibo.
Suno kay Ang, iga-require sa mga residente sang Bacolod nga magparehistro sa BaC-Trac bangod indi makasulod sa mga mall, government offices kag kasubong man sa merkado ang wala sini.
Kahapon naman sang ginsuguran ang pagrehistro sa mga empleyado sa Bacolod Government Center.
Samtang nakatalana naman nga magbutang sang mga registration kiosk sa mga mall kag merkado kag pagabutangan nalang sang mga technical staff nga magabulig sa pagrehistro.
Sarang man nga makaparehistro pinaagi sa internet.
Nagpasalig naman ang City Administrator nga madasig lang ang proseso sini kag magakinahanglan lang ini sang mga basic information.
Pinaagi naman sini, mangin mahapos ang pagtrace sa mga magapositibo.
Samtang nakita naman nga mas mangin madali na ang pagsulod sa mga establishimento indi kaangay sa ginhemu nga kinahanglan pa magtsekyar sang ID kag kuhaan temperatura antes makasulod.
