Nalapawan na sang Barangay Singcang ang anay nagapanguna nga Barangay Taculing sa pinakadamo nga kaso sang COVID-19 sa ciudad sang Bacolod.
Suno kay Councilor Lady Gles Gonzales-Pallen, presidente sa Liga nang mga Barangay, nagpanguna na sa karun ang Barangay Singcang kag nasundan sang Barangay Taculing, Barangay Villamonte, Barangay Alijis kag Barangay Estefania.
Natukiban naman nga ang index cases ang nagikan sa mga workplace, opisina kag field works kaangay sang mga medical frontliners.
Sang tinalikdan, nakita man nga yara ang index ukon pagbutyog sang cases sa mga household transmission.
Pahayag ni Pallen, nga sa Barangay Taculing nga nasakupan sini, kadamuan sa mga nagpositibo ang nakalatun man sa iban pa nga katapo sang pamilya.
Bangod sina, wala na ginapahanugutan ang home quarantine magluwas nalang sa pipila nga nahatagan sang exemption.
Ginakuha gin ang mga ini sa tagsa ka panimalay agud nga malikawan nga macontaminate ang pamilya.
Ginpahayag man sang konsehal nga nagapadayun ang “information education campaign” sa kada Barangay agud nga padayun nga magpahanumdom sa mga impormasyon natuhoy sa makamamatay nga balatian.
Samtang may mga inisyatibo man ang pila ka mga barangay sa pagtukod sang “Barangay Task Force Disiplina” nga nagalibot sa pagpanaway sa mga pumuluyo.
Ginapasanyog naman ang pagpatuman sa nasambit nga mga kampanya.
Samtang panugyan naman sini nga kun may close contact nga makabig nga index case kag nakabatyag sang sintomas, kag nagpakuha sang swab, ginapakamaayo nga mag self-isolate na ngadaan agud nga indi na maglapta sa household.
Sa paglantaw naman sini sa hitabo sa sulod sang pito ka bulan nga eksperyensya kasubong man sa pagbasa sa record sang bulletin sang Barangay Health Emergency Response Team (BHERTs), nakita sini nga ang pagsaka sang kaso sang COVID-19 ang tuga sang pagka-kampante sang mga pumuluyo.
Nalimtan sang mga ini ang kabilidhon sang social distancing kag pagsuksok sang facemask, ilabi na sa mga opisina sadtong gamay palang ang mga cases sa ciudad.
Nagapati naman ini nga madamo sang mga asymptomatic nga nagasegi lang sa paglibot.
Aminado naman ini nga nabudlayan sila sa kampanya angot sa swab testing.
Suno sa konsehal, ang nagapanguna gihapon nga yabi sa pagdaog batok sa pandemya amo ang kooperasyon.
Kaupod na diri ang pagsugid sang matuod, pagsunod kag ginapakamaayo nga imbes mang criticize mag bulig nalang.
