Wala na sang kabuhi sang masapwan ang isa ka 24-anyos nga construction worker nga nagahapa kag nagasalom ang guya sa isa ka kanal sa ciudad sang La Carlota sang Biyernes sang aga, Setyembre 25.
Sa interview sang Bombo Radyo kay Police Lt. Col. Jonel Guadalupe, hepe sang La Carlota City Police Station, nakabaton sila sang report nga may nasapwan nga bangkay sa national highway sang Brgy. Ayungon, La Carlota City.
Suno kay Guadalupe, ginkilala ang biktima kay Jeric Pamoceno, 24 anyos, isa ka construction worker kag residente sang Hacienda Guadalupe, Brgy. Ayungon, La Carlota City.
Suno diri, wala na sang kabuhi kag may mga minor injuries ang biktima apang wala pa matumod ang gintunaan sang kamatayon sini.
Suno diri, yara sa abroad ang mga ginikanan ni Pamoceno kag sang ila ini gincontact, nahisugtan nga ipaidalum ang iya bangkay sa autopsy.
Suno sa hepe, santo sa ila imbestigasyon, wala man sang kontra ang biktima kag wala man sang patal nga injuries.
Isa sa mga alegasyon sang kapulisan, suno sa iya, nalipungan ini kag nalunod sa kanal.
Sa karun, nagapadayon pa ang imbestigasyon sang La Carlota City Police Station tuhoy sa insidente.
