Aminado ang alkalde sang Murcia, Negros Occidental nga sila ang may pinakadamo nga kaso sang COVID-19 sa municipal level sa probinsya sang Negros Occidental.
Sa interview sang Bombo Radyo Bacolod kay Murcia Municipal Mayor Jerry Rojas, ginpahayag sini nga ang kalabanan nga nagapositibo sa COVID-19 amo ang mga residente sang Murcia nga nagatrabaho sa syudad sang Bacolod kag mga nag-alabot nga mga Locally Stranded Individuals (LSI).
Suno kay Rojas, kalabanan sa mga residente ang nagaubra sa mga call centers sa Bacolod City kag ginapahibalo sang mga kumpanya ang Local Government sang Murcia agud mapatigayunan sang swab test bangud requirement man ini sa kompaniya.
Suno diri sa 130 ang narekord nga COVID positive case sa banwa kag 22 nalang ang active case kag kalabanan man sa ila ang asymtomatic.
Ginpahayag man sini nga wala sang local transmission sang balatian sa banwa.
Suno kay Rojas, mga eskwelahan man sa banwa ang ginagamit nila agud himuon nga quarantine facilities.
Ginpatrabaho man sini ang mga barangay officials agud nga imonitor ang mga residente bangud sila ang mas nakakilala kag agud man nga mamonitor kun may yara sang mga symptomatic mapahibalo sila kag mapatigayunan sang swab test.
Ginkompirmar man ni Rojas nga regular ang market day kag wala naman sang ginapatigayon nga Tinabo-ay sa banwa sang Murcia humalin pa sang Marso nga nagumpisa ang pandemya.
Wala naman sila nagapasulod sang mga pangayaw.
Nagpanugyan man ang mga alkade nga mangin vigilante agud malikawan nga matapikan sang balatian kag magsunod sang mga health protocols.
