Patay ang isa ka negosyante sa ciudad sang Bacolod matapos ginluthang sang ginaalegar riding in tandem suspects sa Burgos Public Market sa dalan Ramos-Galo, Purok Mabinuligon, Barangay 19, Bacolod City, alas 5:40 sang hapon kahapon.
Sa interview sang Bombo Radyo kay Police Executive Master Sergeant Rommel Bacule, Executive Senior Police Officer sang Bacolod Police Station 4, nagabaligya sang manok kag uling sa kilid sang Burgos Market ang biktima nga si Raymark Endino, 39 anyos, sultero kag residente sang Brgy. 22 Bacolod City.
Suno kay Bacule, nagapungko sa kilid dalan sang nasambit nga merkado si Endino sang hinali lang nga may nagdulog nga isa ka motorsiklo kag ginpaarakan ini sang luthang.
Suno sa mga residente, ginabanta lima ka lupok ang ila nabatian.
Nakaangkon ini sang pilas sa tangkugo kag duha ka pilas sa tiil kag tiyan.
Gindala pa ini sa balay-bululngan agud irevive apang takna alas 7:36 sang gab-i, ginbawian ini sang kabuhi.
Nakuha sa crime scene ang anom ka basiyo sang wala pa maidentify nga calibre sang armas luthang.
Suno kay Bacule, wala man sang pagpamahog nga nabaton ang biktima bangud wala ini sang kontra kag mabuot ini nga tawo suno sa iya pamilya.
Sa karun, nagapadayon pa ang imbestigasyon sang kapulisan tuhoy sa insidente.
