Wala pa sang lead ang mga kapulisan sa pagtiro-patay sa negosyante sang bisaya nga manok kag uling sang Burgos Public Market sa dalan Ramos-Galo, Purok Mabinuligon, Barangay 19, Bacolod City sang tinalikdan nga adlaw.
Sa interview sang Bombo Radyo Bacolod kay Police Executive Master Sgt. Rommel Bacule Jr. sang Bacolod Police Station 4, ginpahayag sini nga wala pa sila sang lead angot sa pagtiro sa biktima.
Madumduman nga ang biktima ang nagapungko sa gwa sang ginabaligyaan sini sang native nga manok sang ini ang gintiro sang riding in tandem suspects.
Nahibaluan nga nakaagom sang pilas sa tiyan, batiis kag sa likod ang biktima nga gindala sa balay-bululngan agud mahatagan sang nagakaigo nga pagbulong.
Suno sa mga nakabati nga mga residente, ginabanta nga tatlo tubtob lima ka lupok ang ila nga nabatian kag ginaalegar man nga gin-ubos sang mga suspetsado ang isa ka magazine sang bala sa pagtiro sa biktima.
Wala pa matumod ang rason sa pagtiro sa biktima.
