Nakita ang balangaw kahapon sa ciudad sang Cadiz sang naglabay diri ang bangkay ni anay Governor Alfredo Marañon Jr. nga nagtaliwan sang Huwebes sang gab-i kag gindul-ong na kahapon sa Sagay City.
Nahibaluan nga halin sa punerarya, ginlabay ang bangkay ni Marañon sa provincial capitol kun sa diin may yara sang malip-ot nga programa kag gindiretso na ini sa Sagay City.
Naghinay ang convoy sang naglabay ini sa Teresita Lopez Jalandoni Provincial Hospital kun sa diin naghatag sang respeto ang mga frontliners.
Sa interview sang Bombo Radyo kay Cadiz City Mayor Salvador Escalante, naghatag man ang mga ini sang water salute bilang pagkilala kag nag-upod sa convoy ang mga fire truck kag nagpaulan sang tubig ang mga bombero sa palibot.
Samtang ginahimo ini, nakakita naman ang mga ini sang rainbow nga ginapatihan nagapakita lang nga yara na sa langit ang anay gobernador.
Nalipay naman ini nga ginbatun sang Diyos si Marañon sa iya nga kamatayOn.
Suno kay Escalante, mabudlay nga sundan ang yapak ni Marañon bilang gobernador kag bench mark man ini para sa mga politiko nga magtinguha pagid sa paghemu sang maayo.
Tuman naman kadamo ang natandog ni Governor Marañon mapadalagko man nga persona ukon imol, ilabi na sa bahin sang mga mangingisda kag mga mamumugon.
Kalabanan naman ang nalipay kag proud nga nahatagan sang kahigayunan agud nga masaksihan ang kasanag ni Governor Alfredo Marañon Jr. kag ginapasalamat man sini sa Diyos nga ginhatag ang anay gobernador agud nga manguna sa probinsya.
Natalana nga ilubong ang bangkay ni anay Governor Alfredo Marañon Jr. sa Sagay City, Negros Occidental sa bwas, Oktubre 4.
Sa interview sang Bombo Radyo Bacolod kay Eric Loretizo, spokesperson sang pamilya Marañon, ginpahayag sini nga bangud sa ginapangatubang nga COVID-19 pandemic, mas ginpakamaayo nga sa mas madali nga panahon ilubong ang anay gobernador.
