Gincontact sang pamilya ni Jennifer Mercader ang mga otoridad sa probinsya sang Negros Occidental bangud natalana sila nga magpadulong sa probinsya kaupod ang anak sang suspetsado nga si Julijean Mercader agud kompirmahon kun matuod nga si Juliet Bransuela Mercader ang nasapwan nga bangkay sa kawayanan sa syudad sang La Carlota, Negros Occidental.
Sa interview sang Bombo Radyo Bacolod kay Police Lt. John Paul Tabujara, hepe sang Murcia Municipal Police Station, ginpahayag sini nga wala na nila namonitor kun sa diin nagpadulong si Juliet Mercader matapos nga una na ini nga nagpalagyo antes pa man magpatigayon sang raid ang kapulisan sa manokan sang target nga si Jennifer Mercader sang Lunes sa Brgy. Minoyan, Murcia suno man sa impormasyon nga ginhatag sa ila sang asset kag ginkakibot nalamang nila nga nasapwan ini sa bahin sang La Carlota City, Negros Occidental.
Madumduman nga si Juliet Mercader ang nasapwan sa kawayanan sa Barangay San Miguel, La Carlota City, Negros Occidental sang udto sang Martes.
Suno kay Tabujara, sa ila nga pag-imbestigar si Juliet ang nagadala sang kuwarta nga kita sa pagbaligya sang iligal nga druga kag ini man ang nagadeposito sa bangko.
Nag-upod ini kay Jennifer sang ini ang nagpuga sadto Marso 2019 kag nagpadulong sa probinsya sang Negros Occidental agud magpanago.
Una nga nagpadulong sila Brgy. Alegria, Murcia apang nagsaylo ang mga ini sa Brgy. Minoyan, Murcia sang ila nabatyagan nga sila ang ginasurveillance sang mga otoridad.
Apang wala naman siya nakita sang asset sang kapulisan sang nag-operate sa Brgy. Minoyan sang Lunes bangud nagaisahanon lamang si Jennifer sa balay.
Ginalantaw man sang mga otoridad nga posible ang kaupdanan man nila ni Juliet Mercader ang may kahimuan sang pagpatay sa iya bangud may dala ini nga dako nga kantidad sang kwarta sang ini ang nagpalagyo kaupod ang isa man ka high value target sang mga otoridad sang Cebu sa iligal nga druga.
Ginpahayag man ni Tabujara nga dako nga grupo ang sa likod sang suspetsado apang indi pa mapalayag sa kahinganan bangud nagapadayon pa ang ila nga surveillance kag nakabase ang grupo sa probinsya sang Cebu.
