Padayon pa nga ginapangita sang kapulisan ang duha ka mga persona nga nagpanghold-up sa isa ka balaligyaan sang mga motorsiklo sa San Sebastian, Lacson Street, Brgy. 32, Bacolod City, alas 3:45 sang hapon kahapon.
Sa interview sang Bombo Radyo kay Police Major Jovil Sedel, commander sang Bacolod Police Station 1, duha ka mga persona nga nagasuksok sang helmet nga may duag pula kag puti ang nagpadulong sa Motortrade Inc., kun sa diin isa sa mga ini ang nagserbi nga lookout samtang ang isa ang nagpadulong sa cashier kag gintayaan ini sang pusil.
Ginkuha sang suspetsado ang kwarta sa cashier nga nagabalor P18,500 kag gilayon nga nagwa sa balaligyaan.
Suno kay Sedel, nagdalagan ang duha pakadto sa nakapark nga motorsiklo kag nagdrive padulong sa north nga bahin.
Ginlagas pa ini sang isa ka kliyente apang bangud naka-stop nga sign ang traffic light, nagpundo ini samtang nagtutuyon naman ang dalagan sang mga suspetsado.
Sa karun, padayon pa nga ginatrace sang kapulisan ang area.
