Ginkompirmar sang tagpamaba sang Department of Education Division of Negros Occidental nga natagtagan na sang modules ang halos tanan nga mga estudyante sa Negros Occidental kag nauna naman ka panagtag ang mga dalagko nga mga eskwelahan kag nakasabat naman sa modules ang iban nga mga estudyante.
Sa interview sang Bombo Radyo Bacolod kay Ian Arnold Arnaez, maayo man ang ginahimo sang iban nga mga estudyante nga mag-advance sa pagsabat sang modules agud nga magdululungan ang ila orientation apang may yara man sang indi maayo nga epekto sa pagtuon sang mga estudyante ang advance nga pagsabat sang mga modules bangud indi naman sila mamonitor para sa ila weekly assessment agud basehan sang ila performance kag indi man mangin maayo ang quality of learning sa mga ini bangud kalabanan sa mga estudyante ang wala ginabasa ang modules agud maintindihan nila ini.
Sa weekly performance man makita ang performance sang estudyante kun ginikanan kag estudyante ang kaupod sa pagtuon para sa homebased instruction.
Suno kay Arnaez, natalana nga managtag dugang nga modules ang mga eskwelahan ilabi na ang mga dalagko nga ginkulang sang ginpanagtag.
Samtang may yara sang nagkalain-lain nga paagi ang mga barangay kag mga parent leaders agud masiguro nga wala sang pagdinugok nga matabo sa paghulog sang mga modules nga naansweran na sa mga dropboxes bilang precautionary measures batok sa COVID-19.
Kaangay lamang sa gin-ubra sang isa ka barangay sa syudad sang Victorias nga nagbutang sang schedule ang barangay para sa mahulog sa drop box bangud indi man palareho ang mga eskwelahan sang mga estudyante.
Ginapasiguro man ni Arnaez nga kalabanan na sang mga eskwelahan sa DepEd Negros Occidental Division ang nakatapos na sa pagpanagtag sang modules isa ka adlaw antes ang pagbukas sang klase.
