Nagahingyo ang pinuno sang Alliance of Concerned Teachers Negros sa mga ginikanan kag kabataan nga intindihon lang anay kun may mga adjustments pa sa blended learning kag kun may yara sang mga feedback, sarang gid nga mapalab-ot ini sa mga eskwelahan.
Sa interview sang Bombo Radyo kay Dr. Gualberto Dajao, ginpahayag sini nga kun may yara sang mga feedback nahanungod sa mga modules, sarang gid ini nga mapadangat sa mga eskwelahan agud madiskusyunan kag mahibaluan kun ano ang tikang nga pagahimuon.
Suno kay Dajao, dako gid ang mabulig sang honest nga mga feedbacks nagikan sa mga ginikanan kag estudyante.
Aminado man ini nga indi perperkto ang modules kag bukas gid sila nga magbaton sang kakulangan bangud bag-o ini sa tanan.
Nagpasalig man ini nga ang posisyon sang ACT-Negros amu ang safe kag kalidad nga edukasyon para sa mga kabataan.
Kahapon, kadungan sang selebrasyon sang World’s Teachers Day, opisyal na nga ginbuksan ang klase kun sa diin nagpatigayon sang simultaneous nga flag raising ceremony sa bilog nga pungsod.
Suno kay Dajao, daw kasabo kag kasaw-a sang ginpatigayon nga flag ceremony bangud wala sang mga estudyante apang wala man sang may mahimu suno diri bangud may ginapangatubang nga pandemic.
Nagapasalamat man ini nga gindumdum kag ginarespetar gihapon ang mga manunudlo kag ang papel sang mga ini sa sosyodad.
