Nagapati ang pinuno sang inter-agency task force against COVID-19 sa Bacolod City nga kumbinsido na ang mga vendors sa Burgos Public Market nga magpaswab matapos ini naghatag sang mga paathag nahanungod sa patigayunon nga pool testing sa tatlo ka mayor nga merkado sa ciudad sini nga Sabado.
Sa interview sang Bombo Radyo kay Vice Mayor El Cid Familiaran, ginpahayag sini nga ikatatlo ka beses na ini nga gin-imbitar sang mga vendors sa Burgos Public Market agud makighinun-anon tuhoy sa patigayunon nga mass testing.
Suno kay Familiaran, maayo ini nga tikang bangud madamo sang mga isyu kag pamangkot nga gindangat ang mga vendors nga iya man nahatagan sang paathag.
Kaangay na suno sa iya, sa mga palamangkutanon nahanungod sa kun sin-o ang magasto sa swab test kag kun sin-u ang mahatag pagkaon sa ila pamilya kun iquarantine ka pauntatun ang mga ini baligya.
Suno sa bise-alkalde, libre ang swab test kag magahatag man sang relief goods ang ciudad sa pamilya sang mga vendors nga nagpaidalum sa RT-PCR test.
Gindugang man sini nga siya na lang ang magasto sa mga gatas nga kinahanglan sang mga vendors nga may kabataan bangud wala ini nalakip sa relief goods nga ipanagtag sang ciudad.
Naghingyo man ang mga ini sa bise-alkalde nga kun pwede i-lift na ang lockdown sa mga merkado kada Dominggo kag suno kay Familiaran, iya ini ipadangat kay Mayor Evelio “Bing” Leonardia.
Suno sa iya, masobra 100 ka mga vendors ang nagtambong sa nasambit nga pamulong-pulong kag nagapati ini nga bangud naathagan na sila, magakooperar na ang mga ini sa patigayunon sang swab testing.
Aminado man si Executive Assistant to the Mayor Ernie Pineda nga madamo sa mga vendors ang natahap bangud sa mga sala nga impormasyon kaangay sang pagpati nga kun iswab ang isa ka persona sa ilong, malab-ot ini sa utok kag kun sa baba naman ipaagi, malab-ot man ini sa tagipusuon.
Suno kay Pineda, wala ini sang kamatuoran kag wala sang dapat kahangaw-an bangud safe ang patigayunon nga swab testing.
Isa man sa mga kahangawa sang mga pumuluyo suno sa iya, amu ang impression nga indi maayo ang pagkaon sa mga quarantine facilities apang nagpasalig ini nga wala gid ginapabay-an sang ciudad ang mga ginaquarantine.
Ang resulta sang swab test nga patigayunon sa Sabado ang ginalauman nga magwa Lunes nga adlaw kag kun positibo ang vendor, igaquarantine ini samtang kun negatibo naman sa virus, sarang na nga makabalik sa pagbaligya.
