Wala sang nasugata nga kabudlayan ukon problema ang Department of Education(DepEd) Division of Negros Occidental sa una nga adlaw sang klase para sa School Year 2020-2021 kahapon.
Sa interview sang Bombo Radyo Bacolod kay Ian Arnold Arnaez, public information officer sang DepEd Division of Negros Occidental, ginpahayag sini nga sa pagsugod sang una nga adlaw sang klase kahapon, wala sila sang may nabaton nga initial feedback nagikan sa mga estudyante ukon ginikanan ilabi na angot sa issue sang online class bangud majority sa mga eskwelahan sa probinsya ang nagagamit sang printed module.
Apang gin-ako naman sini nga sang nagliligad nga sinemana, may yara sila sang na-encounter nga problema sa paghatag sang module kaangay na lamang nga nasaylo ang pangalan sang isa ka estudyante sa pihak nga barangay bangud nga manual ang listahanay sa enrollment.
Bangud sini, wala nahatagan sang module ang pipila ka mga kabataan.
Apang ginpasiguro ni Arnaez nga ila tinguhaan nga mahatagan sang module ang mga wala pa nakabaton.
May yara man sang late enrollees nga wala naisip sa pag-imprinta sang module.
Sa karon suno sa tagpamaba halos 100 porsyento na sa mga estudyante ang ila nahatagan sang module.
