Naghingyo si Talisay City Mayor Niel Lizares nga ipaisol ang tagtaganay sang module sa Oktubre 12 imbes nga Oktubre 5 bangud sa nagasaka nga kaso sang COVID-19 sa ila nga ciudad.
Sa interview sang Bombo Radyo Bacolod kay Ian Arnold Arnaez, public information officer sang Department of Education (DepEd) Division of Negros Occidental, ginkumpirmar sini nga tanan nga mga pampubliko nga eskwelahan sa probinsya ang nagsugod na sang klase kahapon magluwas lamang sa ciudad sang Talisay.
Paathag ni Arnaez nga bangud sa nagadamo nga kaso sang coronavirus sa amo nga ciudad, ginpakamaayo sang alkalde nga ipaiway ang tagtaganay sang mga module sa masunod nga semana agud nga indi makompromiso ang mga estudyante kag manunudlo.
Gintugutan naman sang DepEd ang hingyo ni Lizares bangud nga may yara man sang ‘justification’.
May pipila naman ka mga eskwelahan sa Talisay suno sa tagpamaba nga nagapadayon sa ila nga online class kag may pipila man nga nagsugod na sa ila nga soft copy sang module.
Apang sa mga wala sang ikasarang sa amo nga sahi sang pagtuon, kinahanglan nila nga maghulat sa Lunes agud nga makabaton sang ila nga printed module.
Ginkumpirmar man ni Arnaez nga wala nagapamalay-balay ang mga manunudlo sa pagdistribute sang module kundi may yara lamang sang gina-assign nga drop-off area.
