Padayunon sang bag-o nga city director sang Bacolod City Police Office (BCPO) ang hinimuan kag mga programa ni Col. Henry Biñas sa tunga-tunga sang ginapangatubang nga COVID-19 pandemic.
Sa press conference nga ginpatigayon ni Col. Manuel Placido, ginpahayag sini nga luyag niya lamang ipabilin ang hinimuan ni Col. Biñas ilabi na sa pagtutok sa kampanya batok sa iligal nga druga kag sa iban pa nga mga krimen.
Suno kay Placido, magluwas sa normal nga trabaho sang kapulisan, tutukan man sini ang kampanya batok sa COVID-19 bangud nga isa man sila sa mga nagabulig agud matapna ang makamamatay nga virus.
Dugang pa sang bag-o nga city director nga matapos gid ang problema sa virus kun mag-kooperar lang ang tanan.
Naga-apelar naman si Placido sa mga nakasaksi sa mga shooting incidents nga nagkalatabo sang damlag lang sa Bacolod City nga indi gid magkakulba nga maghatag sang impormasyon.
Suno diri, dako gid ang mabulig sang mga nakasaksi agud madasig nga masolbar ang mga pagpamatay nga nagaluntad sa ciudad.
Nagpanugyan man ini sa mga establisyemento nga kun mahimo, magbutang gid sang CCTV camera.
Madumduman nga sang Oktubre 1, nag-abot ini sa ciudad kag nag-courtesy call kay Bacolod City Mayor Evelio “Bing” Leonardia.
Nagikan ini sa Civil Security Group sa National Headquarters sang Philippine National Police.
Ginbuslan sini sa pwesto si Col. Biñas nga gin-reassign naman sa mas mataas nga posisyon sa Camp Crame.
