Ginpaathag sang budget officer sang Bacolod City sa session sang Sangguniang Panlungsod kahapon kun diin nagkadto ang P199 million nga budget nga nagikan sa Bayanihan 1 kag gindownload sa ciudad agud gamiton sa pagresponde sa COVID-19 pandemic.
Sa session sang SP, ginpahayag ni City Budget Officer Imelda Williams nga P119,198,771 ang kabug-usan nga Bayanihan grant nga nabaton sang ciudad nagikan sa national government kun sa diin P97,521,799.59 na ang na-obligate as of September 30, 2020 samtang P21,676,971.41 naman ang bilin para sa palaabuton pa nga mga galastuhon.
Apang suno kay Williams, may yara sang P789,383.18 nga savings nagikan sa disbursements ang wala nafully consume gani sa kabug-usan, may yara pa sang P22,466,809.59 nga sarang ma-obligate kag mautilized sang ciudad.
Sa maintenance kag iban pa nga mga operating expenses nga ginalakipan sang welfare goods; drugs and medicines; medical, dental and laboratory; materials; rent expenses; representation expenses; kag repairs and maintenance expenses, P77,860,550 lang ang na-obligate nagikan sa P98,483,886 nga budget appropriations gani may balance pa nga P20,623,336.
Samtang, sa Property, Plant and Equipment naman nga ginalakipan sang medical equipments kag buildings and other structures, P19,661,249.59 lang ang nagamit nagikan sa P20,714,885 nga budget appropriations gani may bilin pa nga P1,053,635.41.
Suno sa budget officer, tubtob sa Setyembre 12, 2021 pa sarang nga magasto ang P119 million nga pondo subong man ang budget halin sa Bayanihan 2 bangud gin-extend ni Presidente Rodrigo Duterte ang National Public Health Emergency tubtob sa nasambit nga petsa.
Kun indi ini maubos tubtob sa 2021, igabalik ang kwarta sa national government.
Samtang, klaro kag simple naman ang eksplenasyon ni Williams tuhoy sa P119 million nga budget suno kay Councilor Renecito Novero.
Suno kay Novero, tinutuyo sang nasambit nga eksplenasyon ang mangin transparent ilabi na nga sensitibo nga topiko ang kwarta.
Suno sa konsehal, nakasumiter naman ang City Budget Officer sang ila report kag igafinalize ini kag igapasa sa Commission on Audit mismo.
Aminado ini nga kun kwarta ang hambalan, madasig gilayon nga magtuga sang malisya kag espekulasyon gani ginakabig sini nga maayo nga tikang ang natabo sa SP kahapon bangud ila nakit-an nga legitimate ang ginkadtuan sang pondo.
