Nagapati ang pinuno sang inter-agency task force against COVID-19 kag bise-alkalde sang Bacolod City nga epektibo ang stratehiya ni IATF deputy chief implementer for Visayas Gen. Melquiades Feliciano sa pagtapna sang virus subong man ang kooperasyon sang mga pumuluyo sa pagnubo sang numero sang kaso sa ciudad.
Sa data nga ginpagwa sang Department of Health Region 6, nakarekord lang sang anom ka mga kaso sang COVID ang Bacolod City, una nga kahigayunan nga nagtupa sa one-digit ang numero sang kaso sa ciudad, samtang 20 naman ka mga kaso ang narekord sang Miyerkules.
Sa interview sang Bombo Radyo kay Vice Mayor El Cid Familiaran, ginpahayag sini nga epektibo ang stratehiya ni Feliciano nga pagpangita sang virus agud matapna ini subong man ang kooperasyon sang mga pumuluyo.
Nagalaom man ang bise-alkalde nga masustain ang ini nga numero kada adlaw.
Suno diri mas maayo nga unahon na pangita ang virus sang sa maghulat nga may magwa nga positibo kag amu pa pagtapna sini.
Gindugang niya man nga ang ginpatigayon nga mass testing kag patigayunon pa nga test sa mga vendors ang isa sa mga pamaagi agud makit-an ang virus.
Nagaampo man si Familiaran sa mga pumuluyo nga updan ang programa ni Mayor Evelio “Bing” Leonardia nga mapaidalum sa modified general community quarantine (MGCQ) sa bulan sang Nobyembre agud makabalik na sa normal sa Disyembre kag makaselebrar sang Paskwa.
